المكان:
أي حارة...أي ردهة...
أي حديقة...أي مقعد...أي شرفة...
أي شاطئ...أي فسحة خيالية احتوت حبيبين...
الزمان:
باقة من لحظات كثار تزيد كلما ضاع الحب...سميت لحظات الوداع...
الشخصيات:
هو....و هي....
و ناس.... و واقع.... و قدر...
(الموقف الاول)
هو: مستحيل لازم لاقي حل
هي: تلاقي حل...لشو الحل ؟؟
يا ريت فيني اهرب من هالدنيا لحتى كون معك
هو: شو رح تنفع يا ريت
هي: معناها نحنا لازم نبعد...
بس المشكلة انا ما بقدر
هو: لو كنت بقدر...كنت الت لازم نبعد من زمان...انا بحبك عنجد و انتي بتعرفي هالشي بس
هي: بعرف شو رح تقول...
هي غصة بحلقي...انا مسلمة و انت..
هو: لا تكملي...ساعات بتمنى لو خلقنا كلنا بدين واحد لحتى كون انا و انتي مع بعض..
**القدر**
اوا تنتظران املا ايها التائهان...
اوا تنتظران معجزة تقلب تبدل الاديان...
اوتنتظران ان القي بشفاعتي عليكما لتجتمع بينكما الاوطان...
اذهبا...ابتعدا...فها هو الحب ضاع...و حانت لحظة الوداع...
( الموقف الثاني )
هو: انتي بتعرفي منيح شو بحبك و بتعرفي انو لو بايدي ما كنت سمحت لاي شي يفرق بيننا
هي: بس هيك بهالسهولة بدك تروح
هو: شو بعمل اذا الناس كلهون ضدنا
هي: لا تكون ضد حالك انت كمان...
انا صحيح فقيرة...يمكن ما يكون عند بابا السيارات يلي عند ابوك...
و لا المصاري يلي معباية البنوك...
بس نفسي عزيزة...و بضل انسان متل كل هالناس...
هو: هاد الكلام لا بيقدم و لا بيأخر...
اهلي اختارولي بنت من عيلة غنية و معروفة و انا مضطر اقبل و الا بيتبرو مني لانن هنن ما بيقبلو...
هي: ما بيقبلو شو...ما بيقبلو ينزعو اسم العيلة ببنت فقيرة متلي...و هي البنت يلي اختارولك ياها رح
تحبك متل ما بحبك...و انت رح تحبها متل ما حبيتني...و كيف رح تعيشو مع بعض..
هو: مو هيك بس..
هي: لا تكمل انا بعرف انك بتحبني...بس كمان بتحب اهلك و ما بيسوى انك تخالف امرهون حتى لو كان
على حساب سعادتك...
** القدر**
اما زلت تحلمين يا فتاة...
و انت ايها الشاب هل وجدت طريقك للحياة...
اين الامل ان كنت انا بيدي قد قطعت كل سبيل للنجاة...
و سيرتكما بارادتي في غابات الهجر حفاة عراة...
اذهبا...ابتعدا...فها هو الحب ضاع...و حانت لحظة الوداع...
( الموقف الثالث )
هو: لو شو ما كان لازم ضل جنبك
هي: بس انت شب صغير و ما بيعيبك شي و الف بنت بتتمناك
هو: انا اخترتك انت و ما بيهمني قد ما كنتي اكبر مني...ثلاث سنين...اربع سنين...حتى لو كانو عشر
سنين بدي ياكي انتي...
هي: بس هالشي صعب...ما حدا بيتقبلو...اهلك ما بيتقبلو...المجتمع ما بيتقبلو..
هو: ما بيهمني أي شي...اذا بتكوني معي بوقف بوجه أي شي بهالدنيا...
** القدر**
اسألكما بالله أن تعصرا الدموع...
فقد اطفأت في ليل الحلم هذا كل انوار الشموع...
و غزلت سنينا سنينا بينكما...
لامنع الحب بين شذى الازهار من الرجوع...
لاغصبكما...و اقهركما...وامامي اجبركما على الركوع...
اذهبا...ابتعدا...فها هو الحب ضاع...و حانت لحظة الوداع...
( الموقف الرابع )
هي: انت بتعرف شو ضحيت لحتى ضل جنبك و هلأ بدك يانا نبعد
هو: انا بدي ابعد عنك لاني بحبك...
لانو بدي ياكي تكملي مع شخص اصغر مني يعطيكي السعادة يلي بتتمنيها..
هي: بس انا سعادتي معك حتى لو بدك تقتلني...
هو: كلامك بيدبحني...انا ما بدي اجني عليكي...بكرا الناس بتقتلنا...و بيقولو شوفو اخد وحدة قد بنتو...
هي: بس انا ما بيهمني كلام الناس انا بحبك انت و بدي كون معك للاخر..
** القدر**
ايتها الياسمينة لا زلت جميلة...
يا ايها الكهل قد مرت على روحك سنوات طويلة...
اوتحلمان ايضا بالامل...كلا سأقلب اليوم تلكم الارواح اضلاعا هزيلة...
سأنشر البعد و ابعّد بالسنون عنكما امالا ستبقى مستحيلة...
اذهبا...ابتعدا...فها هو الحب ضاع...و حانت لحظة الوداع...
( الموقف الخامس )
هو: انا بحبك من زمان...بدي الك هالشي بس كنت خايف
هي: عنجد انا ما بعتبرك اكتر من صديق او اخ
هو: بس انا مستعد اسعدك و قدملك يلي بدك ياه
هي: ما بدي ياك تتعذب معي بس انا بحب شخص تاني
هو: انتي واثقة انو هالشخص بيحبك و رح يقدملك يلي رح قدملك ياه
هي: ما بعرف بس انا بحبو و ما بقدر اتخلى عنو
** القدر**
اهدأ يا صاح اهدأ...
قد المتك الفتاة بهذا الكلام...لكنها لا تقصد...
قد تكون مثلك مبلية بوحدة الغرام...
فأنا هكذا احب ان أعقد القلوب ببعضها في الظلام...
لكي تحِب و لا تحَب...و تحَب و لا تحِب...
و تهوي من سماء قلبك المذبوح عصافير السلام...
اذهبا...ابتعدا...فها هو الحب ضاع...و حانت لحظة الوداع...
( الموقف السادس )
هي: معقول هيك ما نقدر نتفق او نلاقي حل
هو: صح نحنا لازم نلاقي حل
هي: بس انت هيك مقتنع...بمجرد اني ما رح كون متل ما بدك انت رح تتخلى عني
هو: و انتي كمان نفس الشي..نحنا صح بنحب بعض و كتير كمان بس ما في شي مشترك بينا...
انتي بدك شي و انا بدي شي...افكارك غير افكاري...يعني صعب نتفق
هي: هلأ غلط اذا انا فكرت بقلبي و انت فكرت بعقلك...
و هاد الحب يلي بينا مو كفيل انو يجمعنا مو كفيل يشيل كل الحواجز..
هو: ما بعرف يمكن...
هي: كيف ما بتعرف..
هو: هيك الدنيا بدها...
هي: نحنا مو لازم نستسلم اذا عنجد بنحب بعض
** القدر**
لا تعجلي...لن تلقي حتى الامل...
لن تصلك السعادة مني على عجل...
سأذبحك يا نفس حتى ار في عينيك دموع الوجل...
و سأمزق الحب فيك كي ارى ضوءا احمر يتوهج من دماء المقل...
اذهبا...ابتعدا...فها هو الحب ضاع...و حانت لحظة الوداع...
(الموقف السابع )
[size=21]جلست امامه...جلس امامها...
بين اناس كثر...
و كل منهما يشحن فكره بمئات الافكار دون ان يبوح...
هو: هل تراها تحبني...لا ادري
هي: هل تراه يحبني...اني بعد اجهل
هو: عيونها تقول لي بأنها تحبني...لكن من المستحيل ان اخبرها...قد أصدم...
من الحري بي ان ابقى هكذا احبها دون ان تدري...
هي: يا ليته يخبرني...يا ليته يقول لي...يا ليت الاقدار تخبره كم احبه...
لكن انا لا...لا استطيع ان اقول...شجاعتي دوما تخذلني...
اخاف ان اخبره فأبتعد عنه بدلا من ان انال قربه...
هو: يا ليت شفاهك تنطق ما تنطقه هذي العيون...
يا ليتها تعزز شكي ببعض اليقين كي اعرف الى اين سيؤدي حالي...
هي: تكلم...افصح...قل أي شئ...فأنا انتظر كلمة...هل تحبني...قل لي...ريح قلبي...
هو: لو ادري ما يجول في نفسك الان...لو اعلم من يتربع على عرش هذا القلب الرقيق...
لو استطيع ان احس بأكثر مما احس فيه...
هي: تكلم....ارجوك
هو: تكلمي....ارجوكي
و صمتت الافكار و قام الاثنين...
و قد علق كل منهما فكرة على شرفة روح الاخر بنظرة سريعة...قائلا له ارجوك افصح...
و رحلا...و رحلت الافكار...و بدأت افكار جديدة تدب اسرارا مؤلمة على وسائد الايام...
و ضاع الحب من جديد...لاجل خوف و كتمان.....
وهـــكـــــذا يــضــيــع الحــــــــــــــــــــب....
موضوع: قصــة الحــب الضــائع 
05.03.09 1:32
